Dictes moy ou, n'en quel pays,

Est Flora la belle Rommaine,

Archipiades, ne Thais,

Qui fut sa cousine germaine,

Echo parlant quant bruyt on maine

Dessus riviere ou sus estan,

Qui beaulte ot trop plus qu'humaine.

Mais ou sont les neiges d'antan?

 

Ou est la tres sage Hellois,

Pour qui chatre fut et puis moyne

Pierre Esbaillart a Saint Denis?

Pour son amour ot ceste essoyne.

Semblablement ou est la royne

Qui commenda que Buridan

Fust gete en ung sac en Saine?

Mais ou sont les neiges d'antan?

 

La royne Blanche comme lis

Qui chantait a voix de seraine,

Berte au grant pie, Bietris, Alis,

Haremburgis qui tint le Maine,

Et Jehanne la bonne Lorraine

Qu'Englois brulerent a Rouan;

Ou sont ilz, ou, Vierge souvraine?

Mais ou sont les neiges d'antan?

 

Prince, n'enquerez de sepmaine

Ou elles sont, ne de cest an,

Qu'a ce refrain ne vous remaine:

Mais ou sont les neiges d'antan?


biovil